Bitte um Erlaubnis zur Heimreise.

Augsburg, 18. April 1510

München, HStA, Gemeiners Nachlaß 28, fol. 99, Orig. Pap. m. S.

Gruß. Fueg euer weyshait zu wissen, das mir in meinem so lang aussensein vil beswerung und irrungen in mein handeln und aus[s]tendigen, verfallen schulden furfallen und begegnen, das auch dyjehen, so mit mir in handlung sten, rechnung und furter verträg mit in weiter zu machen, meins so langen aussenseins groß beschwär tragen, meins besorgens, sich dieselbigen von mir und mit andern zu handlen einlassen möchten, und sust ander obligen hab, daran mir nit wenig gelegen will sein. [Ich habe] zu der zeyt deshalb schaden gelitten und lenger auszupeleiben meiner obligen und handels halb, auch darmit mererm mein schaden zu furkumen, nit erleiden mag. So ist deshalb mein untertanig bit, dyweil ich euer weyshait zu wilfarung nun in der zwelften wochen aussen pin, der zeyt nach euer weyshait bevelch mit meinem H. Schmaller meins vermugens und verstands gemainer stat zu ere und nutz geren das pest gehandelt het, wo es euer weyshait von nöten will ansehen, ain andern an meiner stat tun hetten, auf Georgi [23.4.10] herauf zu verornen, wan ich aus oberzelten obligen und beschwerungen von meinem handel und narungen an merklich schäden, des mir euer weishait verhofft nit gunten, lenger auszusein nit tun möcht. Solichs hab ich euer weishait, von mir in guetem aufzunemen, darnach haben zu richten, nit wellen verhalten, mit wünschung uch allen vil säliger zeyt. Des bit ich widerumb antwurt. Datum Augspurg pfintztags nach suntags misericordia domini Ao. etc. xmo.