[1.] Notwendigkeit der Beendigung des gegenwärtigen Krieges vor Winterbeginn; [2.] Forderung nach Einberufung eines Reichstags nach Augsburg zum 1. September und dortige Durchführung des geplanten Konzils.

ohne Ort, [Juni 1511]1

Innsbruck, TLA, Maximiliana I 44/20 I. Teil, fol. 273a-282b, Konz.

Ratschleg

[1.] Item im anfang so sein die sachen, wie die diser zeit steen, auch all vergangen handlung und was ksl. Mt. weiter begegnen möcht, aigentlich bewogen und nach lengs disputiert und darauf geratschlagt, daz seiner ksl. Mt. notdurft erforder, auch nutz und gut sey, daz sich sein ksl. Mt. dermassen dareinschick, damit sein ksl. Mt. disem krieg vor angendem winter ain endschaft gebe, dann solt daz nicht beschehen und widerumb darzu komen, daz sein ksl. Mt. den winter, in massen wie die nechstvergangen jar, Bern [= Verona] und ander flecken mit ainer besetzung underhalten mueße, daz were seiner ksl. Mt., auch iren landen und leuten ganz beswerlich, als daz sein Mt. selbs wol zu ermessen waist.

[2.] Dann von wegen des reichstags, dieweil ir Mt. aus den geschriften, so von den verordneten commissaren komen, vernymbt, daz die Ff. alle hilf abschlagen und sich allain auf den reichstag waigern, auch zu besorgen ist, solt ir Mt. etlich stende vom Reich und nit all beschreiben, es möcht alsdann ainer auf den andern waigern, wie dann seiner Mt. vor im [150]8. jar beschehen ist,2 ist geratschlagt, daz in all weg not und gut sey, die sach schick sich zu fried oder nit, daz die ksl. Mt. ainen reichstag auf prima Septembris gen Augspurg ausschreiben lass und darin den jungsten abschid des reichstags, zu Augspurg gehalten [Nr. 125], anzaig, auch in sonderhait dareinstel, wie das concili durch die cardinal ausgeschrieben seye,3 und daz sich sein Mt. versehe, dasselb concili auf obbemelt zeit auch daselbsthin zu pringen. Dabey ist auch geratschlagt, daz die ksl. Mt. keinswegs daz concili abstellen las vor entlichem austrag dez kriegs. [...]