Wien HHStA, RK RTA 7, unfol. (Reinkonz.); ÜS: Supplicatio der stat Goßlar.

Burgermeister und rath zu Goßlar haben ksl. Mt. supplicirt, wie Hg. Heinrich von Braunschweig verruckter zeith widder gemeine recht und keiserliche constitution und außgekhundte landtfriden ir hutten und bergkwerckh uf dem Ramersberg sambt irem silber, blei, ertzstolen, holtz und allem vorrath uf den hutten mit der that gewaltiglich ingenomen und entsetzt, sie auch ein urtheil am chammergericht erhalten, das ir widdertheil sy in vorigen gebrauch und besitz der hutten sambt erlitten costn und schedn restituiern soll. Wiewoll sie uf sollich urtheil executorial erlangt, taxation der gerichtlichen expenß erhalten und der entwerten gutter, auch costen und scheden halb zu recht beschlossen, so hob doch das chammergericht uf ungestum anhalten und ungnugsam bericht des Hg. von Braunschweigs uf jungst gehalten reichstag zu Augspurg inen, den hertzogen, zu dem petitorio gelassen. Dergleichen hetten di ksl. Mt. den vorkauf der metallen wider ergangen urtheil, eher und zuvor sie als di spoliirten wurcklich restituiert worden, sequestriert und gemeingelegt, welliche zulassung in petitorio, suspension und daruf gevolgte sequestration ire gesandte damals nit anderst dann auß forcht der cominierten acht uf vorgeend protestacion, von den erkhannten und bewilligten urtheil restitucionis nit abzuweichen. Wann dann solliche suspension der ergangen und bewilligten urtheil, auch bescheene sequestration widder recht und ksl. Mt. und des reichs ordnung, auch den hessischen und der stat ufgerichten vertregen zuwider, betten sie gantz undertheniglich, di ksl. Mt. wollen sollich beschwerlich suspension ergangner urtheil in possessorio, dergleichen das berumbt sequestrum in ansehung, daß sollich suspension und sequestrum inen zu ewigem, unwidderbringlichem schaden gereicht und an sich selbst widder recht sei, allergnedigist abschaffen und inen zu wurcklichen execution ires erlangten rechten allergnedigist verhelfen. Ob innen zu gruntlicher und wurcklicher vollziehung sollicher urtheil etwas im rechten geburen wolt, darzu wollen sy sich undertheniglich erbotten haben.

Das auch di ksl. Mt. in alweg bei irer Mt. camergericht gnediglich verschaffen und versehen thun wolten, das ane lengern verzug in andern schwebenden sachen widder Braunschweig zu recht procediert und nach herbrachtem des cammergerichts gebrauch volnfaren werde, sonderlich in causa purgationis, und daß di zeugen ad perpetuam rei memoriam, derwegen si oftermals bei ksl. Mt. undertheniglichist angesucht, furderlich abgehort und darin comissarien verordent werden mugen, dann sie grosse vorsorg tragen, dieweil sich dieselbige sach so lang verzeucht, daß di zeugen mochten mitlerzeith abgeen, wie etliche schon verschiden, und inen der personen halb di probation abgestrickt wurde. Und diweil etlich zeugen des hertzogen lehenman und etliche, wie sie glaublich bericht, mit sondern eiden verstrickt sein, von disen artikeln, davon di purgationartikel melden, nichts zu sagen, betten si di ksl. Mt. in aller underthenigkeit, den hertzogen dahin zu vermugen und durch rechtlich mittel anzuhalten, sollich zeugen sambtlich und sonderlich irer eid und pflicht, di lehenman zu diser zeugknus, di andern aber gentzlich erledigen und sie derselbigen loßgeben wolle, und in dem allem als ein loblicher keiser und das lebendig recht selber mit gnaden erzeigen. Das umb euer ksl. Mt. wollen sie in aller underthenigkeit und gehorsame verdienen.

Ist fur gut angesehen, das Kff., Ff. und stendt di ksl. Mt. zum underthenigisten ersuchten, das ir Mt. di acta in sachen des landtfridens, hinc inde zwischen dem Hg. von Braunschweig und Goßlar an dem camergericht sich erhalten, beide zu remidiren, den sindicatoribus (di auch revisores sein werden) gnedigst remittieren und denselben bevelhen, auch alle andere handlung zwischen jetz gemelten partheien biß zu endt der revision sambt der goßlarischen acht suspendirn wollt.