Augsburg StadtA, Lit. 1541, unfol. (Kop.).

Eur ksl. Mt. haben uns Oswalden Hartungs supplication, darinnen er bitt, ime als einem usgetrettnen schuldner von eur ksl. Mt. uff funf jar verzug zu geben, uberantwurten und bericht begeren lassen. Darauf geben wir eur ksl. Mt. in facto einen solhen grundtlichen bericht, wie eur ksl. Mt. auß seiner glaubiger underricht, hiebeyligund mit A verzaichnet, genedigist vernemen werden. Darbey aber bitten wir eur ksl. Mt., genedigist zu vernemen, das ein erber rath der statt Augspurg fur solche oder dergleichen uffzug in geltschulden gefreiet sind, inhalt der freyhaiten der copia, hiebeyligundt mit B verzaichnet. Dieweil dann dem also und das solich ungeschickht, geverlich handlung nit allain nit gefurdert noch gestattet, sonder vilmer gestraft werden sollen, so bitten wir eur ksl. Mt. gantz underthenigist, die wellen gedachten Harttung in seinem unbillichen vorhaben genedigist abweisen und abschaffen lassen.