Verhandlungen der kgl. Räte Erasmus Topler und Heinrich Hayden mit dem Rat der Stadt Konstanz über ein Schiedsverfahren im Streit mit Bf. Hugo von Konstanz.

Konstanz, 11./14. August 1507.

Konstanz, StdA, B I, Nr. 25, fol. 236–237 passim.

/236/ [11.8.] Kleiner und Großer Rat: Dr. Doppler und Haiden bringen an des Bf. halb: Des ersten, dz yede party ainen van kgl. Mt. raten erkiesen solt; ob aber dz nit sin mocht, dz man nem H. Hansen van Stadyan; wolten sy lugen bi kgl. Mt., dz der ang[enommen] wurd. Zum andern, das der anlaß recht vergriffen, das die zwen commisary biurtailen geben möchten und kundschaft hören. Zum dritten hab der Bf. und capital ain beschward, dz mit wissen kgl. Mt. sprechen sölten, wurd im Niderland etc. sin, dz man den ardikel hußließ, da find man ander weg. Zum vierden, das ain yeder bi siner besitzung beliben sol; es dien aber in den anlaß nit, dz aber ain rat sich selbs handhab und ain Bf. sich auch. Und dz ainer stat ain schin geben wurd, dz man sy bi irm herkomen handhaben wolt.

Fravel und ainer zu H. Hansen [von Stadion] ist nit von geredt.

Antwurt ains ratz: Illa [die], ain rait wyl H. Wilhalmen Marschalk [von Pappenheim] annemen zu H. Ernsten von Wäldin. Das die comisaryen hir biurtailen geben solten, wyl ain rait nit annem. Was aber Hg. Fridrich [von Sachsen] mitsampt sinen zusazen, es syn byurtailen ader sunst, erkennen ader kuntschaft hören, geb ain rat zu. Darum die comissaryen sollen kain urta[i]l geben. Sy mogen aber gutlich als verhörer darin handeln. Was aber zu der urtail kumpt, sol den rechten richtern zugeschickt werden. Zum dritten wyl ain rait kurz, dz die mit wissen kgl. Mt. gesprochen werd, dann dz erst und ander co[m]promiß ist uf ime gestanden. Zum vierden, wyl dz ain rait in besitz, nutz und genieß yedes rechten unvergriffenlich syn.

/236’/Sy [= Topler und Hayden] sagen, Hg. Fridrich well darin nicht sprechen, der handel syg dann entlich da und biurtailen geben. H. Wilhalm Marschalck mag nit dasin. Da hait man H. Hansen Druchsasen [von Waldburg] fürgeschlagen. Sagen sy, er sicz mit kgl. Mt. rat.

Ain rait wyl, dz mit wissen kgl. Mt. darin gesprochen werd. Conrat Tun oder Gf. Hansen von Werdenberg, Dr. Stürczel und H. Hans Druchsäß, da sol man ainen nemen. Die verhörer söllen kain byurtail geben etc. Denn wie solt man biurtail geben, so man den handel nit uf ain nuws horen solt. Man sol bi der besitzung beliben. [...]

/237/ [14.8.] Kleiner und Großer Rat: Illa, man sol lut des vertrags handeln und ain obmann erwelen, yede party ain furschlag tun, ob man ainandern treff. [...].

Illa, es sol yede partyen, der Bf. III und ain rat III, erkiesen. Dieselbigen sollen ain obmann nemen, und derselbig obman soll mit den VI des vertrags gutlich, ab der handel hingelegt werden möcht, handeln. Ob er aber nit gutlich hingelegt werden mocht, dz sol dann Hg. Fridrich zugeschickt werden; was er dann nit gutlich hinlegt, darin rechtlich sprechen. Und ist man in hoffnung, Hg. Fridrich werd härbracht. Ob er aber nit kem, sol man im die artikel versekretiert zuschicken. Ist also van grossen und klainen raten angenomen.