Auftrag zur Vermittlung zwischen Bf. Reinhard von Worms und der Rst. Worms.

Brüssel, 29. Mai 1512

Worms, StadtA, 1 B 1944/1, o. Fol., Kop. (inseriert in Nr. 1261 [35.]; Randvermerk: Die gütlichayt).

Wolgeborner, edlen, ersamen, gelerten und lb. getreuen, nachdem uns unser F., Bf. Reinhart zu Wormbs, schriftlichen und dann Bm. und rate daselbs durch ir gesandten bewilliget haben, sich vor uns auf unserm gegenwürtigen reichstag in allem dem, das yder tayl gegen dem andern getraut zu genyssen, in der gutlicheit horen zu lassen, und wir aber demselben unsers abwesens und anderer unser merklichen gescheft halben selbs nit auswarten mügen und doch die parteyen gern gütlich vertragen sehen, so emphelhen wir euch ernstlich und wollen, das ir die gemelten parteyen, so ytz zu Trier sein, fur euch ervordert und mit allem vleys und ernst an sy begert, auf euch in einen gutlichen vertrag zu bewilligen, und, so ir das erlangt habt, alsdann understeet, sy gutlich zu verainen und zu vertragen, damit weiter unwill, auch cost und schaden vermiten bleib. Und zu furdrung des sollet ir gemelten Bf. zu Wormbs anzeigen, wo er solich gütlich handlung abslagen würd, so müge er selbs gedenken, dieweil die sachen on mittel unser und des Reichs obrikeit berürt, das uns nit wol leidenlich wer, andern zu gestatten, daryn zu handlen, sondern die sachen by uns selbs zu behalten. Daran tut ir unser ernstlich meynung. Geben in unser stat Brüssel in Brabant am 29. tag May Ao. etc. 12.