Reichstagsakten Mittlere Reihe. Reichstagsakten unter Maximilian I. Band 11. Die Reichstage zu Augsburg 1510 und Trier/Köln 1512 bearbeitet von Reinhard Seyboth

Weisung zur Erlangung der ausstehenden Restsumme des Augsburger Reichsanschlags.

Konstanz, 15. Oktober 1510

Stuttgart, HStA, A 80 Bü. 3, o. Fol., Orig. Pap. m. S. ( p.r.p.s.; c.d.i.p.; Gegenzeichnung: Ruysl).

Instruction, was unser getreuer Johan Begen, unser diener, mit dem hochgebornen Ulrichen, Hg. zu Wirtemberg und Deck, Gf. zu Mumplgart, unserm lb. swager und F., handlen und ausrichten soll.

Anfangklichen sol er seiner lieb unsern credenzbrief uberantwurten und darauf sagen unser gnad und alles gut. Darnach soll er anzaigen und erzelen: Als jungst unser und des Reichs lb. getreuer Conrad Thom, seiner lieb marschalk, bei uns hie zu Costenz gewesen sey und uns von seiner lieb wegen in abslag des anslags und hilfgelts, seiner lieb auf dem jungstgehalten reichstag zu Augspurg auferlegt, 4500 fl. rh. bezalt und vergnugt habe und uns sein lieb daruber zu ganzer bezalung solhs anslags, der ime dann auf 36 pherd und 49 ½ fueßknecht, das alles zusamen trifft 6696 fl. rh., und noch 2196 fl. rh. zu tun schuldig beleibt, ine darauf von unsern wegen mit allem vleis ersuchen, das sein lieb ime solhen rest der angezaigten 2196 fl. rh. gegen unser ksl. quittung, die er ime darüber und gegen emphahung der quittung, so wir ime vormals umb die berurten 4500 fl. rh. gegeben haben, zu unsern handen uberantwurten und bezalen und uns solhs nit waigern noch dheins wegs verziehen wolle, angesehen, das wir solhs gelts zu underhaltung unsers kriegs gegen den Venedigern, darauf uns dann yetzo merklicher costen geet, ganz notdürftig sein und gebrauchen müssen. In solhem soll der gemelt unser diener Johan Begen allen möglichen vleis furkeren, damit er solh gelt von berurtem unserm swager, dem von Wirtenberg, erlang und zuwegen bringe und so er das emphangen hat, uns dasselb alsdan unverzogenlich an unsern hof, wo wir dann sein werden, zu pringen. Ob ime aber darinne ainige irrung oder angezaigte antwurt begegnet, des wir uns doch nit versehen, uns derselben schriftlich berichten und darauf unsers ferrern beschaids bei demselben von Wirtemberg etc. erwarten. Daran tut er unser ernstliche mainung. Geben zu Costenz am 15. tag Octobris Ao. etc. decimo, unsers reichs im 25. jar.