Einbeziehung der Erfurter Gesandten in die Schiedsverhandlungen zwischen dem EB von Mainz und dem Kf. von Sachsen, Bitte um Übersendung einer Supplikation an den Ks. in Sachen der Frankfurter Rentner von Erfurt.

[Trier], 24. Juni 1512

Frankfurt, IfStG, RTA Bd. 29, fol. 25, Orig. Pap. m. S.

Hat das Schreiben vom 17. Juni (Nr. 1712) erhalten.

Der van Erfort halber ist nit on, for 5 ader 6 tagen ist mich he souligs auch angelankt, ond darof in he auch for 16 persoin herberg ferfangen. Ond hat de gestalt, ksl. Mt., onser allergnst. H., hat sey sampt dein ausgetreten borgern heher gein Treher of dein rigsdak erfordert [Nr. 1084], zussen mein gnst. Hh. van Menz [und] Saxen, beyde Kff., tzo handeln ond antzozigen, waromb de van Erfort de ausgetreten borger of ir Mt. manigfeltege gebotzbrif net wider intreten lassein wiln, ond sey weter ferrichten wil. Wil aber mit allem fliß eyn ofseins haben, ab sey etwas erlangen wolten, sofil mir das moglig tzo ferhuten, ond ferhalten, bis ich uch weter schribein. Des ich dan gout weg hab. Mich duch[t] aber for gout angesein, das mir tzwe soplicazion an ksl. Mt. tzogeschikt, glig luten. Darin ir Mt. onderdeniklig gebeten, ab de van Erfort etwes erlangen, das wider onser borger, de re[n]tener, wer, daß solig ir Mt. net aus liß gein, dan solig gemeiner statt ferderben wer, mit weter onderdeniger beyt. Wolt ich de, so ich etwes fernem, in hufrat gebein. Ich wil duch netdesminder, sobald se hercomen, mich by meinem gn. H. van Seretein fougen ond beytten, nechts wider onser re[n]tener austzogein lasein, das ons tzo nochdil comen mocht, met witer anzig etc. Datom den 24. dak Junios Ao. 1512. jar.