Empfehlungen ksl. Räte für das weitere Vorgehen in Oberitalien, den baldigen Beginn des Augsburger Reichstags und eine Abstimmung mit dem Kg. von Frankreich.

Innsbruck, 22. November 1511

Innsbruck, TLA, Maximiliana XIII 256/II, fol. 34a-38b, Konz.

Instruction, was röm. ksl. Mt. secretari Wilhalm Butsch bey ksl. Mt. von mein, Ziprian von Serntein, canzler, wegen handeln und reden sol.

[...] Hat die ksl. Räte Dr. Matthias Khuen von Belasi, Dr. Erasmus Toppler, Hans Kaspar von Laubenberg, Bartholomäus von Firmian und Johann Renner zusammengerufen und mit ihnen diskutiert. Und nach vil langen handlungen so bedunkt sy und mich vor allen dingen das nutzest zu sein, daz ir Mt. Bern [= Verona] wol und noturftiglich besetz und verseh, dann wo dasselb beschiht, so müg ir Mt. alweg dest e ain frid erlangen ader ain anders erobern, das die veind yetzo ynhaben, dann an allen sachen stee Bern. Und wo ir Mt. ye kain zug in Friaul kund tun, als dann wol zu versehen ist, daz es nit beschehen mug, so das volk wider gen Bern ziht, daz darumb ir Mt. Gorz, Graditsch und derselben vesten flecken notturftiglich besetzet. Und daz ir Mt., derweil der sumer wider herget, den reichstag furderlich anfieng und hielt, damit, wo mitler zeit kein frid erlangt wurd, daz dann ir Mt. auf den Merzen oder Aprilen gefasst wär, widerumb gegen den veinden mit gewaltigem her fürzunemen. Daz ir Mt. auch mitler zeit mit dem Kg. von Frankreich handelte und sich aller sachen halben mit im weiter vertrüge, damit solh fürnemen auf den früling dest füglicher und stattlicher beschehen mochte. Und so ir Mt. des willens ist, wider hieher zu komen, ye ee dann ir Mt. hieher kämb und ye ee ir Mt. gen Augspurg zuge und mit dem Reich handelte, auch sunst allerley für augen umb gelt suchte, ye besser mich dasselb bedeuchte. Ir Mt. mochte auch dardurch die Ff. dest ee bewegen, daz sy auf solhen früling ains tails selbs auch mitzügen. [...] Geben zu Insprug am 22. tag Novembris Ao. etc. 11.