A  Weimar HStA, EGA, Reg. H pag. 391 Nr. 148 Bd. 1, fol. 23r–24v (Kop.); DV v. a. Hd. fol. 24v: Copey des gleits zum reichstag zu Regenspurg, dem churfursten und Lgf. zu Hessen geben, 1541.

B  koll. Dresden HStA, 10024 GA, Loc. 10321/05, Belangent das gesprech, so zu Wormbs gehalden 1540, fol. 196r–197v (Kop.); ÜS fol. 196r: Gleyt des keysers; DV v. a. Hd. fol. 197v: Causa Hg. Johans Kf. habuit tale gelayt

C  koll. Frankfurt ISG, Reichssachen II Nr. 904, fol. 96r–96v und fol. 99r (Kop.); ÜS fol. 96r: Forma des zugeschickten der ksl. Mt. geleydts, welches doch unbesigelt.

Wir Karl der funft etc. bekhennen offenlich mit disem brief und thuen kundt allermenigclich: Als wir ainen gemainen reichstag in unser und des reichs stat Regenspurg furgenomen und darauf unser und des reichs Kff., Ff. und stende erfordert, das wir demnach auf a –diemuetig ansuechen und–a pitte der hochgebornen Johansfriderichen Hg. zu Sachssen, Lgf. zu Thuringen und Mgf. zu Meissen, des hl. röm. reichs ertzmarschalckh, und Philippsen, Lgf. zu Hessen, unserer lieben oheimen, churfursten und fursten, denselben unsern oheimen, churfursten und fursten, auch iren rethen, hofgesindt und dienern b –sambtlich und sonderlich–b mit aller derselben haben und guetern, so sy yetzo ungevarlich bei sich haben und mitbringen werden, unser strackh, frey sicherhait und glayt gegeben haben und geben inen das wissentlich in craft ditz briefs, also das sy zu beruertem unserm angesetzten reichstag frey, sicher komen, darauf, solang der weren wirdet, beleyben c –und nach ausgang desselben oder sonst irer notturft und gelegenhait nach–c dadannend in ire sichere gewarsam abtziehen sollen und mögen, von uns und allermenigclich unverhindert. Doch sollen sy sich, wie sich gepurt, glaitlich halten.

Und gebieten darauf allen und yeden e –unsern und des reichs–e churfursten, fursten, gaistlichen und weltlichen, prelaten, graven, freyen herrn, rittern, knechten, haubtleuten, vitzdomben, vögten, pflegern, verwesernf, schulthaissen, burgermaistern, richtern, rethen, burgern, gemainden und sonst allen andern unsern und des reichs underthanen und getreuen, in was wirden, stats oder wesens die sein, ernstlich und wöllen, das sy die genanten unsere oheimen, churfursten und fursten, den Hg. zu Sachssen und Lgf. zu Hessen, sambt baider irer L. rethen, hofgesindt und dienern mit allen iren haben und guetern, so sy ungefarlich bey sich haben und mitbringen werden, bey diser unser freyen sicherhait und glait berueblich und gentzlich beleiben lassen, schutzen, schirmen und handthaben und sy daran nit irren noch beschweren, auch andern ze thuen nit zuesehen noch gestaten in kain weise, als lieb inen seye, unser und des reichs schwere ungnadt und straff zu vermeiden. Daran thuen sy gantz unsern willen und ernstlich mainung.

Mit urkundt ditz briefsg, besiglt mit unserm kayserlichen aufgetruckten insigel. Geben in unser stat Lutzelburg am dritten tag des monats Januarij anno etc. im 41. unsers kaiserthumbs im 21. und unserer reiche im 26h.