[1.] Übersendung des Ratschlags Hg. Georgs in der Jülicher Erbsache an ihre Reichstagsgesandten; [2.] Neuigkeiten zum Erfurter Streitfall.

ohne Ort, 3. September 15121

Dresden, HStA, GA, Loc. 8800/1, fol. 186, Orig. Pap..

[1.] Als eur lieb uns auch an einer zettel uf die uberschickten copien, wie die rete zu Coln der erfurtischen und gulchischen sachen halb geschriben, wider geschriben, haben wir auch vernomen. Und daz wir den reten sonder eur lieb wissen dieselb antwurt geben, ist der eyl halb und der sachen zu gut beschen. Und wiewol wir uns versehen, der reichstag werd in kurz sein endschaft haben, so haben wir doch den reten eur lieb bedenken in der gulchischen sachen sambt den andern brifen an Cesar Pflug, ritter, von stund durch die post zugeschickt, ine auch dabey geschriben, die sache derselben anzeigen nach dahyn zu vleisigen, daz sie nit in lengern verzog gestalt werde.

[2.] Wir wellen euch auch nit verhalten, daz uns Wolf von Weispach, ritter, sind des [= seitdem] geschriben, daz die rete das mandat furgelegt haben; des die Meinzischen entsatzt. Hat uns doch dobey nit angezeigt, was auf das mandat gehandelt wurdet und wie die sache stee, sondern uns zwu copien zugesandt, wie Meinz an ksl. Mt. und die stende und sie, die rete, widerumb an ksl. Mt. suplicirt haben, wie eur liebe das ab inligenden copien vernemen werden.