Wien HHStA, RK RTA 6, unfol. (Kop.).

Ce que esté aujourdhuy advisé vers Monsr  le duc Férédich [sic!] soubz le bon plaisir de sa Mté.

Que l’on fera dire par le maréchal de l’empire à tous les princes, qu’ilz délaissent de mener gardes par la ville. Et se fera de sorte, que null’y puisse penser, que ce soit pour occasion particulière d’aucuns d’eulx.

L’on advisera le duc de Brunswych, comme le lantgraff a accepté ce que sa Mté luy a déclairé, qu’elle entendoit, que entre eulx ny autre estat de l’empire se fit chose, qui bailla occasion de débat pour venir à voye de fait. Et a bien certiffié ledit lantgraff à sa Mté, qu’il observeroit ainsi.

De cecy seront advertiz les ducz de Bavière amyablement et par manière de confidence par le conseillier de Naves.

L’on a parlé au chancellier du lantgraff afin de cesser de plusavant faire ny publier livres, lequel a respondu, que sondit maistre obéyroit au bon plaisir de sa Mté quant au duc de Brunsvych, mais que aucuns de ses serviteurs en avoient fait, chacun particulièrement, èsquelx luy convenoit nécessairement donner quelque responce. Et aussi sur ung autre public nouvellement soubz ung nom dissimulé, par lequel il est griefvement et atrocement injurié, comme il fera apparoir à l’empereur. Surquoy a esté persisté, que riens ne se publia, jusques sa Mté y eust ordonné, dont ledit chancellier a dit, qu’il advertiroit sondit maistre, et selon cela l’on regardera ausurplus ce que sera de fait.

L’on a advisé, que la proposicion pour commencer la prouchainne diètte se pourra faire après la venue de Monsr  de Meance, que l’on tient sera icy vendredi. Et pourra estre ladite proposition pour lundi et au mesme jour se célébrera la messe, advertissant ung jour devant les estatz d’icelle sans presser personne de soy y trouver.

Que Monsr  le duc Fédéricqu s’excusera avec quelque honneste préambule à l’occasion de son indisposicion de faire verballement ladite proposicion et priera, qu’ilz soient contens, qu’elle soit lencé. Et l’empereur en pourra veoir la translacion en francoys entre cy et là pour y adjouster, dyminuer et en ordonner à son bon plaisir.

Touchant la venue du duc de Saxen électeur semble, qu’elle est très requise et nécessaire et que mondit Sr  le duc devoit persister à icelle bien expressement envers les ambassadeurs dudit électeur et davantaige qu’il parle très acércés [sic!] aux dépputéz de la chambre impérialle estans icy pour surceoir toutes procedures, dont l’on peult prendre occasion d’empescher le progrès et effect de ceste diètte, suyvant ce, que leur en fut dit, remonstré et ordonné pendant que sa Mté estoit à Spire et que s’il en advient faulte par leur moien, on s’en prendra à leurs personnes.

Aussi mondit Sr  le duc parlera à Monsr  l’évesque de Meyssen pour surceoir de son coustel toutes procedures et fera dire de la part de votredite Mté par le conseillier de Naves au duc de Braunzvych, qu’il pourvoye effectuellement de faire cesser toutes violences et ledit duc Fédéricq advertissant lesdites ambassades de ses diligences leur certiffiera, que sa Mté impériale pourvoiera, que venant icy ledit électeur il n’en aura empeschement et, si luy est fait, il y remédiera à son raisonnable contentement conforme au saulfconduit et surcéance faicte par sa Mté.

Touchant Monsr  de Cologne l’on attend l’advis de ses commis estans icy, lesquelx ont prins delay pour y penser jusques après disné et l’on fera selon ce.

Quant aux gens de guerre, que l’évesque de Brixen entend faire lever au nom du roy, l’advis de sa Mté a esté trouvé bon, advertisse les compagnons estans icy sans faire sonner tabourin leur déclairant, où ilz se devront assembler et recevoir argent sur le chemin.

Il a esté advisé de encores faire une recharge à Monsr  le conte palatin afin de venir icy.

Quant à la cession [sic!] d’entre le duc de Brunzwych et lantgraff l’on regardera encores soit par s’informer des registres ou par aucun de gens comme on y pourra bailler expédient.

Aussi touchant le droit de la cession [sic!] d’entre le lieu[t]enant du roy des Romains et Monsr  de Saltzburg1.