Madrid, Real Biblioteca, Fasz. Mss. 2232; fol. 93r–94v; DV fol. 94v: Regensburg 1541; DV v. 3. Hd.: Légat, concille.

Sur ce que le légat et nonce du pape ont mis en avant le concille pour le remède de l’inconvénient, qu’est en la Germanye touchant notre saincte foy et religion.

Fait en premier lieu à considérer, qu’ilz ont dit, que c’estoit la finale détermination dudit sainct père et peult l’on tenir pour tout certain, que selon qu’il est [...?] de toutes ses opinions, qu’il demeurera arresté en ceste, tant plus qu’il a pour ce l’advis du collège des cardinaulx.

Et quant à actendre aultre responce sur ce que depuis a esté escript à Rome tant touchant le livre que pour remonstrer à sa Sté l’inconvénient apparent en ceste Germanye l’on peult aussi croire, que ledit sainct père pensera avoir satisfait au premier par la proposition dudit concille et à l’aultre moyennant les cinquante mille ducatz, qu’il offre, et généralement de faire ausurplus selon qu’il sera advisé.

Et tant plus se tiendra il en ladite résolution pour ce que le roy de France mesmement la allosera nonobstant qu’il aye moins du voulonté audit concille ou aussi peu que ledit sainct père et le fera ainsi tant pour soy couvrir et qu’il a tousiours indirectement traversé ledit concille que pour tenir ledit sainct père et tout le collège en craincte et nécessité de luy, et sera à propoz quoy qu’il soit des intentions dudit sainct père et roy de France de empescher, que riens se face ou pourvoye icy contre ledit sainct père ny aussi perd ledit roy de France faveur en ceste Germanye.

Davantaige que ceste invention dudit concille procède des cardinal de Mayence et ducz de Bavyère pour leurs particuliers respectz et y ont attiré la pluspart des prélatz pour diffuyr leur réformation.

Et aussi que généralement il semblera à tous estatz tant de ladite Germanye que de la reste de la chrestienté, que ledit sainct père fait ce qu’est en luy en offrant ledit concille et, si sadite Mté ne l’accorde, il semblera à ceulx, qui n’entendent l’exigence de l’affaire et [...?] dudit sainct père, que le remède de notre saincte foy reste par sadite Mté.

Ce que dessus présapposer sera bien de regarder sur ce que s’ensuyt:

Sadite Mté en reprenant ausdits légat et nunce les debvoirs, dilligences et sollicitations, qu’elle a fait pour ledit concille et continué de temps à aultre, approuve et loue, que ledit concille se célèbre selon qu’elle l’a tousiours désiré, moyennant qu’il soit tel, qu’il doibt estre et que l’effect s’en ensuyve pour lequel il se doibt célébrer, en remonstrant ausdits légat et nunce les empeschemens et inconvéniens que y fault considérer et leur remectant d’en faire comme ilz verront convenir.

Et entre aultres que ledit sainct père et eulx mesmes scayvent bien comme de long temps ledit concille a esté poursuy et aulcune fois accordé et les difficultéz pour lesquelles il ne s’est célébré.

Que quant aux roys et princes de dehors la Germanye y ayans mis directement ou indirectement empeschement sadite Mté ne les veult remémorer plus particulièrement s’en remectant à ce que lesdits sainct père, légat et nunce en scayvent.

Mais bien veult sadite Mté remonstrer comme tous les estatz de la Germanye, quant il [est] esté traitté de concille ès dièttes passées de Ausbourg et d’icy ont expressément persisté, qu’il se célébra en l’empire, et depuis se sont arrestéz, que ce fut en la nation germanicque, et seroit bien de scavoir, si ilz demeurent tousiours arrestéz en ce poinct tant les catholicques que protestans et si ce nonobstant l’on fait ladite indiction.

En oultre que aussi ilz scayvent comme lesdits protestans ont expressément protesté allencontre du concille indict par notre sainct père, non seulement pour la cause susdite, mais aussi pour vouloir avoir ledit concille libre, et aussi convient regarder, si ce nonobstant l’on debvra passer oultre audit concille.

En oultre que lesdits légat et nunce regardent à ce que eulx mesmes ont dit en ceste diètte et l’ont confermé aucuns et mesmement des prélatz, que ledit concille n’estoit requis pour plus examiner les erreurs dont l’on est en discord estant desjà déterminéz par les concilles passéz.

Et pardessus ce vueillent aussi considérer, si l’indiction dudit concille, encoires qu’elle fut certaine et aussi qu’il dust avoir effect, seroit suffisante pour du moins obvyer et empescher, que plus grande confusion ne advienne en ceste Germanye selon que l’on a expérimenté et veu ce qu’est succédé dèz les dernières dièttes de Ausbourg et de ce lieu et que l’on peult comprendre les dilligences, que feront les protestans d’attirer gens à eulx, et l’inclination, que y ont la pluspart des estatz caholicques.

a –Le tout tendant affin de [...?] que ledit concille se célèbre tel, qu’il doit estre pesant, pourvoyant et remédiant les difficultéz avantdites et que soit avec effect [...?] remectant ausdits légat et nunce de en bien pesant et examinant le tout [en faire] [...?] mieulx leur [... ... ... ... ...?] –.

Si sera bien de remonstrer davantaige, que dèz ladite diètte d’Ausbourg il fut fait très grande instance par lesdits estatz de la réformation des ecclésiasticques, dont est procédé l’inconvénient et que, si aulcune chose en a esté ordonnée, riens s’en est exécuté ny fait et que encores en cestedite diètte tousiours lesdits protestans si sont arrestéz et tous lesdits estatz ont généralement remonstré et dit, qu’elle estoit très nécessaire, afin que l’on saiche, si lesdits légat et nunce en ont quelque charge de notre sainct père ou en ont aulcune chose advisé entre eulx et avec lesdits prélatz ecclésiasticques comme chose plus que requise et nécessaire pour empescher, que le mal ne passe plusoultre, et sans quoy il est impossible d’y obvyer.

Et pour ce que lesdits légat et nunce ont persuadé l’ampliation et fortiffication de la lighe catholicque fault regarder, s’il sera bien d’adviser dèsmaintenant comme l’on y pourra besongner et les qualitéz et conditions, afin qu’elle serve pour l’effect principal, pour lequel elle s’est dressée et non pour particuliers desseings ny pour rebouter ou empescher la commune paix et concorde, pour mectre en entière despération les protestans et aussi, que l’on saiche certainement ce que ledit sainct père et le siège apostolicque vouldront contribuer.

Item, si sera bien, que lesdits légat et nunce soyent entremis pour encheminer ladite lighe mesmes envers les ecclésiasticques.

Aussi sera bien de regarder, si l’on debvra encores persister envers lesdits légat et nunce pour scavoir, si l’on debvra du tout entièrement rebouter le livre et ce qu’a esté fait en la communication tenue en ce lieu, tenant regard, que en ce cas les protestans vouldront demeurer libres de prescher et faire tout ce qu’ilz vouldront, nonobstant ce dont ilz se sont retiréz en plusieurs poinctz notables, ou si l’on pourra trouver quelque moyen pour les retenir et empescher d’aller au contraire de ce qu’ilz ont confessé et déclaré, comme ilz ont fait dois la communication dudit Ausbourg.