Überlingen StadtA, Missivenbuch 1539–1542, fol. 86r–86v (Kop.).

Erstlich, dieweil röm. ksl. Mt. etc., unsers allergnedigsten hern, mandat und ausschreiben vorgemelts reichstags inhalt, zu handeln der eingefallen zweyspalt unser heiligen, cristenlichen religion, soll er hierinnen bey röm. ksl. und kgl. Mt. und dem tail der stendt des hl. reichs pleiben, wie wir bisher dabey und unser alten, cristenlichen religion beharrt sindt.

Verrer, wa dann ainer eylenden und beharlichen turgenhilf halb gehandelt, soll er sich mit den meren stenden des reichs davon nit sondern. Dieweil wir aber uber den halben tail unsers vermögens in des reichs anslegen verlegt worden sind, sol er bey ksl. und kgl. Mt. underthenigist anhalten, ob wir bey den begnadungen, wie uns die auf vorvergangen turgkenhilfen gnedigist beschehen, pliben mogen, und hierinen zu erlangung desselben allen getreuen und moglichen vleis ankern. Wa er aber dasselbig nit erlangen möcht, soll er verner bey ksl. und kgl. Mt. und den stenden des reichs supliciern, uns unserm vermögen gemess in eylender und beharlicher turgenhilf pleiben zu lassen, mit erpietung, unser vermögen antzutzaigen und, wie sich gepurt, einzulegen. Und so uns, solchs alles bey den aiden zu Gott und den hailigen zu betheuren, aufgelegt wurde, soll er auf dise unser instruction, darinnen wir ime under gemainer statt secrett insigel volkomen gewalt gegeben haben, an unser statt und in unser seelen sweren.

Zum dritten underhaltung des kayserlichen camergerichts soll er neben andern stenden des reichs, wa sy darein bewilligen wurden, auch gehellen und sich davon nit absondern.

Und was auf disen reichstag des reichs obligen und notturft nach fürgenomen und für rättlich und wolbedächtlich angesehen würdet, soll er darinen bey ksl. und kgl. Mt. und der mertail der stendt des reichs pliben und sich davon nit abtziehen und sunst alles und yedes nach begegnten [sic!] dingen auf geriertem reichstag handlen, das unser notturft ervordert und wie er, das zu thun, schuldig ist und wir im vertrauen.

Das zu urkundt so geben wir ime dise instruction, mit gemainer statt Uberlingen secret insigel besigelt am 16. tag des monats Apprilis nach Cristy gepurt 1500 und im 41. jarn.