Auftrag zu weiteren Verhandlungen mit Vertretern der Ganerben und Ritter.

Orig. Pap. m. S. (p.r.p.s.; a.m.d.i.p.; Gegenzeichnung: N. Ziegler): Wien, HHStA, RK, Maximiliana 37 (alt 30b) Juli-Aug. 1517, fol. 55.

Kop.: Ebd., fol. 56a; Nordhausen, StadtA, R Ac 01, fol. 110a u. b (Überschrift: Freitags darnach, XVII. Julii, haben die ernenten ksl. rete und commissari den stenden diß hernachgeschriben ksl. credenz furpracht, uberantwurt und demnach ir werbung ungeverlich oberzelter meynung getan. Darauf dan die stende es bey obgeschribner gegebner antwurt noch zur zeit besteen und beruhen haben lassen.).

Erwirdigen, hochgebornen, wolgebornen, edl und ersam, lb. neven, oheimen, Kff., Ff., andechtigen und lb. getreuen, euch werden unser rete und commissari zu Menz die sachen, was yetzo zu Fridberg und Geylenhausen mit den ganerben und andern edln gehandlt ist, zu erkennen geben und etlich ir gesandten selbs auch bey euch erscheinen. Und dieweil denselben gesandten zu swer were, uns hin und wider nachzuraysen, auch in den sachen nyndert fruchtperlicher gehandlt werden mag dann zu Menz, da ir und unser rete und commissari versamelt seiet und die alle der handlung guet wissen tragen, so begern wir an euch mit fruntlichem und ernstlichem vleis, ir wellet euch mitsambt unsern reten und commissarien der berürten sachen beladen und nach eurm rat und guetbedünken daz eerlichist und bestendigist furnemen und besliessen, dieweil ir der sachen am verstendigisten seyet, und uns nichtdestmynder durch unser rete derselben eurer handlung alzeit berichten. So wellen wir euch darynnen allwegen, sovil uns guet bedünket, auch anzaigen. Daran tuet ir uns sonder gevallen und unser ernstliche meynung. Geben in unser und des Reichs stat Augspurg am 12. tag Julii Ao. etc. 17, unsers reichs im 32. jaren.