[1.] Übersendung neuer Kredenzschreiben für die Verhandlungen mit den Ganerben; [2.] Frage der Hilfe für Landau und Annweiler; [3.] Maßnahmen wegen der Übergriffe des ksl. Kriegsvolks gegen kurpfälzische Untertanen; [4.] Bestätigung des Empfangs der von den Reichsständen übersandten Supplikationen.

Wien, HHStA, RK, Maximiliana 37 (alt 30b) Juli-Aug. 1517, fol. 109a u. b, Konz.

[1.] /109a/ Erwirdiger F., lb. andechtiger und edler, lb. getreuer, wir haben eur schreiben, berürend die edlen und ganerben [Nr. 921],vernomen und senden euch hiebey die gelait und neu credenzen laut eurs anzaigens auf dich, unsern F. [Abt Hartmann] von Fuld, den [Gf. Gerhard] von Argk [= Arco],[Wolf von] Schönberg,[Helfrich von]Megkau und Dr. [Johann] Storchen. a–Und ist unser meynung, daz ir solche gelait den ganerben und edlen von stund zuschicket.–a

[2.] So haben wir der von Landau und Anwyler clag und schreiben vernomen, und dieweil wir uns genzlich versehen, daz nuzumal der bestand mit dem [Franz] Sickinger beslossen sey, so ist on not, inen ainichen zusatz zu geben. Wer oder wurde aber der bestand abgeslagen, wellen wir sy mit hilf nit verlassen. Daz wisset ir inen wol zu verkunden.

[3.] Uns gefallet auch, daz ir unserm kriegsvolk zu Worms auf unsers Kf., des Pfalzgf. [Ludwig], begern geschriben habt laut eurs anzaigens.

/109b/ Wir senden euch hiermit ein brief [liegt nicht vor], von unsern haubtleuten und commissarien zu Worms ausgangen. Ist unser bevelch, daz ir dem Pfalzgf. solchs furhaltet und ernstlich begeret, solchen mutwillen bey den seinen abzustellen, auch die gefangen an entgeltnus ledig zu zelen, und ir wisset daz furter demselben unsern haubtleuten und comissarien wol anzuzaigen.

[4.] b–Ir sollet auch den stenden anzaigen, daz wir etlich suplicationen, so sy uns zugesandt [vgl. Nr. 899], vernomen haben. Und nachdem wir und des Reichs stende kurzlich zesamenkommen werden, wellen wir in denselben sachen gnediglich und gepürlich handlen.–b Daran tut ir unser ernstliche meynung. Datum c–Augspurg am letzsten tag Julii Ao. etc. 17–c.