A  Hannover NLA, Hild. 1 Nr. 783, fol. 45r–47v (Kop.); ÜS fol. 45r: Copia der supplication an ksl. Mt. pro executione denuo oblata mit angehengten clagen gegen Hg. Heinrichen von wegen thätlicher beschwerung, dem bischof und stift Hildeshem in das vierdte jhar zugefueget.

B  koll. Hannover NLA, Hild. 1 Nr. 784, fol. 168r–170r (Kop.)

C  koll. Hannover NLA, Hild. 1 Nr. 784, fol. 281r–283v (Kop.).

Eur ksl. Mt. hab ich, derselbigen eur ksl. Mt. underthenigster caplan und diener, verrückter tagen underthenigst zu erkennen geben, wie ich als ein erwelther und vom stuell zu Rhom bestettigter bischoff des stiefts Hildeshem von wegen desselben stiefts guetter, so durch die hochgeborne fursten, etwa Hg. Erich den eltern und Heinrich den jungern zu Braunschweig und Luneburg etc., demselbigen stieft wider recht abgedrungen und von denselbigen und ihren erben ungeverlich zweintzig jar here occupirt und noch thettlich und freventlich besessen werden, am hofe zu Rhom fur babstlicher Hlt. und dem stuell doselbst in rechtvertigung gestanden und daselbst mit hylf des almechtigen urtheyl und recht vermögend, das die ehrgedachte Ff. von Braunschweig den stift Hildeshem unbillicherweyse spoliert und darumb, denselbigen widerumb zu restituirn, schuldig sein, erhalten, auch also das, wiewoll die gegentheille von solicher rechtmessiger urtheyl vermeyntlich appellirt, das doch ihnen dieselbig wie recht refutirt und als freventlich verworfen worden, und domit eur ksl. Mt. des alles glaubwirdige bericht und urkundt haben und entpfahen mochten, derselbigen eur ksl. Mt. die urtheyl und executorialbrieve under babstlicher Hlt. anhengender bleyender bullen und siegel, dergleichen derselbigen ihrer Hlt. an euer ksl. Mt. furschrieft anstatt mandati executivi umb verhelfung gebürlicher execution solicher urtheyl underthenigst uberreicht. Und dieselbig eur ksl. Mt. uff solich mein dargethane gerechtigkeit und erhalten urtheyl sich zu meynem rechten gnediglichst finden und erbotten, deßen derselbigen eur ksl. Mt. ich underthenigsten danck weys, doch gnedigst fur gutt und notwendig angesehen, dweyl Hg. Heinrich, der eine gegentheil, alhie zur stett, demselbigen meine supplication und gethane antzeyg, seinen bericht und antwort darauf zu vernehmen, zukomen mochte, des ich mich eur ksl. Mt. zu underthenigsten ehren und gehorsam nit widersetzen wollen und gerne gescheen lassen. Darauf Hg. Heinrich, gleichwoll nach geraumber zeit, euer ksl. Mt. weytleuftig, ungereumt, ungegrundt und nichts anders vermeldendt noch suchend, dan das ich die sach, so zuvor lang und stattlich gnug disputirt und zu recht entscheiden, von neuhem mit ihme disputirn und deßhalb uff etliche vermeynte articul mit ihme inlassen solt etc., beantwort. Welche vermeinte und unerhebliche antwort, so sie mir von eur ksl. Mt. gnediglichst zugestelt, ich underthenigst entpfangen und nach aller notturft vernomen.

Dweyl ich aber befunden, sein, Hg. Heinrichen, gemüt nit sein, der erhaltenen urtheyl zu geleben und mich und meynen stieft zu restituirn, sonder vielmehr in ungereumbte, unbilliche rechtvertigung zu tziehen, und ich, ihme des noch zur zeit zu volgen, nit schuldig, hab eur ksl. Mt. ich underthenigst vermeldet [Nr. 270], das ich urtheil und recht erhalten, dieselbig in ihre craft und wirglicheit gangen, darauß zu tretten und weiter mit ihme deshalb zu rechtvertigen, ich in recht nit schuldig oder pflichtig, darumb auch, darvon zu tretten oder zu weichen, desto weniger und gar mitnichten bedacht, demnach eur ksl. Mt. underthenigst gebetten, dieselbig als ein von Gott verordenter obrister advocat, vogt, schutz und schirmer der kierchen und handthaber des rechten mir zu gepürlicher recuperation meins stiefts guetter vermöge erhaltener urteill gegen die widerteylle gnediglichst verhelfen wolte, mit dem angehengten erbietten, da ich inhalt der urteyl und wie recht restituirt und alsdann Hg. Heinrich oder sein anhang mich zuspruch nit zu erlassen gedächte, das ich alsdan ihme fur babstlicher Hlt., eur ksl. Mt. und an orthen und enden ich zu recht schuldig ordenlichs, geburlichs rechten nit fursein wollte.

Allergnedigster kayser, dweyl diese meyne antwort dem rechten und aller billicheit gemeß, auch nichts billichers, dan das die wolgesprochne, rechtmessige urtheil ba[b]stlicher Hlt. und des stuells zu Rom, consistorialiter cum consensu omnium cardinalium gefellet, gebürlich und fürderlich vollenstreckt und exequirt werd, so steht zu eur ksl. Mt. noch und abermahls mein underthenigst, vleyssigst und demütigst, vlehligs bietten, eur ksl. Mt. wollen gnediglichst erwegen, wie unbillicherweyß der arm stieft Hildeshem, welche ein fundation und stiftung Caroli Magni hochlöblicher gedechtnus, durch die obgerürte Ff. von Braunschweig so lang zeit seiner guetter entsetzt, beschwerth und in verdruck geradthen und das noch uff diese zeit nichts anders durch vielgemelthen Hg. Heinrich gesuecht wirdt, dan wie er das ubrig auch (welchs, dweyl dasselbig in ander leuth hand und durch meyne furfahren zum hochsten verpfendt, nit ein nhamen des ubrigen haben sollt) und also den stieft gantz und gahr ihme underwurfig machen möchte.

Dergleichen wellen eur ksl. Mt. allergnedigst bedencken, wie mit grosser mühe und unkosten die sachen dahyn gearbeyth, das der almechtig sein gnad geben, diesselbig mit urteyll und recht entscheiden und fur mich und meynen armen stieft gefallen ist, darzu, wie hoch beschwerlich die armen des stifts underthanen, geistlich und weltlich, durch die gegenteylle jetzo occupierth, mit diensten und schatzungen taglichs und on underlaß beschwert, geschetzt und bys auf den grad außgesogen werden, auch also, das man- und weybscloster und stieft, die doch von kaysern und königen, auch im rechten solicher beschwerung gefreyet, damit sie die aufgelegte beschwerung und schatzung außrichten, ihrer kierchen, closter und stieft erbeigen, beweglich und unbewegliche guetter und, darauf sie fundirt und gestieft, verpfenden, verkeuffen, distrahirn und alienirn und also die lengde außgeschatzt und aller ihrer guetter entbloßt gar verlauffen muessen, wie sie dan algereid nach alienirthen guethern hungers und notturft halb verlauffen und außgetretten, welchs alles dem gegentheyl und sonderlich Hg. Heinrichen nichts zu schaffen gibt, sonder viel lieber sehen, hören und vernehmen wolt, das sie gereydt alle verlauffen und er die guetter alle allein haben mocht, darumb auch und von wegen solicher unmentschlichen und unchristlichen beschwerung die armen underthanen teglichs zu Gott in hymel schreyen und umb erledigung rueffen, und dem allem nach wellen eur ksl. Mt. als ein gnedigster, guettiger und mylther kayser, schutz und schiermer der verdrückten, haubt und liebhaber des rechten zu rettung der beschwerthen und zu steuer dem rechten allergnediglichst beschaffen und befuegen, die woll und rechtmessige, unverlegliche, gesprochne urtheyl wie recht und billich vollenzogen werd2.

[Beilage:] Bericht Bf. Valentins von Hildesheim über seine mehrjährigen Auseinandersetzungen mit den Schikanen und feindseligen Aktionen Hg. Heinrichs von Braunschweig und seiner Helfershelfer, ebd. fol. 47v–62v 3.