Wien HHStA, Belgien PA 37/1, fol. 86r–87v (Kop., Beilage zu Nr. 231); ÜS v.a.Hd. fol. 86r: Copie de la copie de la trêve proposée entre l’empereur et le duc de Clève du 24 avril 1542 [!].DV fol. 87v: Coppie de l’escript dressé pour la cessation des armes en Clèves et Julliers.

[86r] En nom de Dieu. Le Sr de Grantvelle, suyvant le bon plaisir du roy des Romains et en faveur et considération et à la très instante prière des électeurs, princes et estatz de l’Empire et de leurs dépputéz, que se dénommeront en passant le traicté, accordera la cessation des armes, tresve et abstinence de guerre de la part de l’empereur et la royne douaigière d’Hongrie, comme régente des Pays d’embas, de la guerre qu’est entre lad. royne et iceulx pays et le duc de Clèves et les siens jusques quinze jours après l’arryvée de sa Mté impériale en l’Empire germain, supposant qu’elle y sera au plaisir du Créateur en ce prouchain mois de may ou juing ensuyvant. Et que lesd. estatz, selon qu’ilz ont proposé et délibéré, envoyeront leurs embassadeurs devers sad. Mté au lieu de Yspurg [= Innsbruck], si elle ne ordonne autre lieu en lad. Germanye dois son arryvée. Et si trouveront avec eulx ceulx dud. duc de Clèves avec pouvoir exprès, ample et souffisant pour appaiser tous différendz avec sad. Mté, et avec ferme espoir que led. duc se mectra en devoir avec telle humilité que sad. Mté aura cause par l’intercession desd. etatz de user de clémence envers luy. Et oultre ce que lad. royne a conquis et tient ès terres et pays dud. duc de Clèves iceluy duc mectra ès mains de celluy ou ceulx que lad royne dépputera en dedans quinze jours prouchains la ville de Zittart pour ensemble le district et appartenances d’icelle le tenir et en joyr plainement, librement et paisiblement durant lad. cessation des armes et par tout le temps d’icelle.

Et en cas que sad. Mté impériale ne vint déans led. temps en l’Empire germain, sera au bon plaisir d’icelle de pouvoir proroguer lad. tresve pour tel temps qu’il luy plaira. Et si venant sad. Mté la paciffication de tous différendz ne se peult faire et que sad. Mté se veuille départir de lad. tresve,a–elle le fera ratiffier souffisamment aud. duc de Clèves trois mois au paravant que luy mouvoir guerre directement ou indirectement par luy ou aultre en sesd. pays, et aussi restituera lad. royne lad. ville de Zittart de bonne foy–a, réalment et par effect. Et pendant lad. tresve et pour le temps que sad. Mté impériale la vouldra prolonguer, comme dit est, led. duc de Clèves ne pourra directement ou indirectement ayder ny assister le roy de France ny aultres ennemys quelxconques de sa Mté et de l’Empire et promectra et jurera, comme aussi le promectront et accorderont sesd. embassadeurs, dois maintenant [86v] de ainsi l’observer et faire observer par ses vassaulx et subgectz de tous les pays qu’il tient léalement. Et se passera cested. cessation d’armes et tresves, comme dit est, dois maintenant et se observera dois le 6e du mois prouchain, pendant lequel temps lad. royne et led. duc de Clèves seront advertiz par leurs ministres et pourvoyeront d’ung coustel et d’aultre respectivement lad. cessation d’armes. Et délivrera led. duc de Clèves en dedans lors ses lettres de ratiffication de ced. traicté à lad. royne, contenans promesse de garder tout le contenu aud. traicté léalement sur sa foy et son honneur, et en la délivrant recepvra celle de lad. royne, le tout de bonne foy. Et pour plus grande shureté de lad. tresve lesd. commis desd. estatz se sont fais fors qu’elle se observera du coustel dud. duc de Clèves syncèrement et plainement.