Augsburg StadtA, Lit. 1543, unfol. (Reinschr.); ÜS: Anno 1543 im Meyen1.

Als meiner herrn von Augspurg gesanten auf verschinen reichstag zu Nurnberg gethone raittung [= Rechnung] hiebey inhelt, find ich im entpfahen – ausserhalb der 700 fl., so von dem gelt, das die statt Hall erlegt hat – in alls [= insgesamt] 613 fl. 12 kr., wolliche mitsampt dem gelt, so von der statt Hall entpfangen worden, durch den secretari Gabriel Engelhart verrait worden.

Dieweil aber ich, Jorg von Stetten, piß umb den Palmtag [1543 März 18] einnemer geweßt und in alls zu Nurnberg von den welserischen, des herrn Bgm. Hanns Welsers brudern, 600 fl. muntz entpfangen, volgends von Gregori Mair 150 fl. und zu Augspurg auf zerung gen Nurnberg 100 fl., thut alles 850 fl., davon dan wie obsteet die 613 fl.12 kr. verrait seind, rest noch zu verantworten 236 fl. 48 kr.

Das volgt hernach: Erstlich wie Dr. Ulstett bey 3 wochen zum Oxenfelder in der herberg gelegen, alda ich auch erstlich eingekert, mit dem wirt aller ding abgerait [= abgerechnet], im zalt sampt ainem faß wein, so er uns in die neue herberg gekauft, in alles 62 fl.

Mer iber das in Engelharts raittung steet, in der erst zum einkauffen mer außgeben, so niendert verrait [= verrechnet] ist: 5 fl.

Mer meinem knecht auß erlauben des burgermaisters ainen rock der stattfarb gemacht und dem Wolff Ferber und Petter Koch, so ainfach röck hetten, dieweil es so kalt was [!], lassen underziehen. Kost alles 10 fl.

Item des kunigs trometter 4, so ain trinckgelt bey uns suchten, geschenckt gold 2 fl.

Umb ain sattel zu der notturft 3 fl.

Meinem knecht sein livergelt [= Livreegeld] 11 fl.

Als wir abschied[en], etlich klain ding - letz [= Abschiedstrunk, Abschiedsmahl], bestelwerck [= Flickarbeiten] und anders - in eyl zalt: 2 fl.

Item furlon von all unserm gerett piß her, des mir alles haimgefurt ist: 3 fl.

Und hiemit iberantwort ich meinem herrn, so ich noch ibrig gelt hab, gold und muntz 74 fl.

Das alles macht in summa 785 fl.[12 kr.]2.

Also stiend mir noch auß zu verraitten in als 64 fl. 48 kr. Dieselben hab ich am hinabreitten, wider heraufreitten und wider hinabreitten mertails verzert, rest sunst aintzig zu der notturft verklait und zu täglichem prauch außgeben, dan ich mir selb kain livergelt, wie ich zu thon wol befugt, gerait, sunder also fur mich selb nit weitters, dan das mich zimlich gedeucht, gepraucht, aber sunderlich nit angeschriben. Damit will ich also meinen herrn diese raittung gefertigt und mich inen bevolhen haben. Actum ut supra.

[US:] Jörg von Stetten der älter.