Augsburg StadtA, Lit. 1543, unfol. (Reinkonz.).

Eur schriftlich antzaigen, was euch neben und mit den unsern wider der stende des andern thails vermainten publicirten abschiedt zu protestirn verursacht, haben wir sambt eurem angehengten gutdunckhen und begeren schikhung halb ainer tauglichen person zu ksl. Mt. etc. [Nr. 278] vernomen. Und weren fur unsere personen unsers vermogens genaigt und begierig, alle und yede sachen, die gemainer christlichen verstendtnus zu wolfart, eer, nutz und gutem gelangen mochten, zum hochsten und mit bestem vleiß zu furdern und an uns nichtzit erwinden zu lassen. Dieweil wir aber diser zeit mit solchen personen, die an dise und dergleiche ort in so wichtigen sachen zu gebrauchen, nach ervorderter notdurft nit versehen, wir auch deren personen, die etwan dartzu tuglich und ir fur bequem achten mochten, obligender gemainer unser stat gescheft halben nit empären konnen, so ist unser gantz frundlich bitt, ir wollend uns, in betrachtung yetzt ertzelter ursachen ditzfals verschonen und unsere waigerung anderer gestalt nit, dann wie vermelt ist, vermerckhen und annemen, der trostlichen zuversicht, unser gnedigst und genedig herrn, die oberhaubtleut, und gemaine stende der christlichen verain seyen dannoch gotlob mit leuten dermassen begabt und versehen, das an solcher schikung nit manglen wiert2.